Policia në Serbi ka kryer arrestime të shumta në lidhje me tragjedinë në stacionin hekurudhor të Novi Sadit, ku më 1 nëntor 2024 u shemb çatia, duke shkaktuar vdekjen e 16 personave.
Mësohet se janë arrestuar deri tani gjashtë persona, mes tyre edhe Tomislav Momiroviç, ish-ministër i Ndërtimit dhe Infrastrukturës për periudhën 2020-2022. Momiroviçi u arrestua në aeroportin e Beogradit pak para se të nisej me avion drejt jashtme, raportojnë mediat serbe.
Policia ka tentuar të arrestojë edhe një ish-ministër tjetër, Goran Vesiç, por ai nuk është gjetur në shtëpi. Sipas njoftimeve të fundit, Vesiçi u transportua urgjentisht mbrëmë në spital ku i është nënshtruar një operacioni kirurgjikal.
Ai ka mbajtur postin e ministër i Ndërtimit dhe Infrastrukturës nga viti 2022 deri në mes të nëntorit 2024, kur dha dorëheqjen për shkak të tragjedisë në stacionin hekurudhor.
Janë arrestuar gjithashtu edhe zv.ministrja e të njëjtit dikaster, si dhe disa zyrtarë të kompanive që ishin të përfshirë në rindërtimin dhe rikualifikimin e stacionit hekurudhor.
Tragjedia ndodhi vetëm tre muaj pas përfundimit të punimeve të rindërtimit të stacionit.
Arrestimet u urdhëruan nga Prokuroria e Përgjithshme për Krim të Organizuar, e cila po heton mundësinë e korrupsionit gjatë rindërtimit të rrjetit hekurudhor nga Beogradi deri në kufirin me Hungarinë.
Në njoftimin zyrtar të prokurorisë thuhet se të arrestuarit, si dhe pesë persona të tjerë në kërkim, dyshohen për “keqpërdorime financiare me qëllim përfitimin personal”. Gjithashtu raportohet se nga veprimet e tyre është shkaktuar dëme në buxhetin shtetëror në vlerë prej 115 milionë dollarësh.
Vdekja e 16 personave në stacionin hekurudhor të Novi Sadit shkaktoi një valë reagimesh të forta. Studentët, duke kërkuar përgjegjësi politike dhe penale, kanë protestuar prej nëntorit 2024, duke mbajtur të bllokuara fakultetet e universiteteve publike.
Sot, në përkujtim të nëntë muajve nga tragjedia, në Novi Sad dhe qytetet e mëdha të Serbisë do të organizohen tubime përkujtimore në nder të viktimave.
