Një tentativë grabitje ka ndodhur pas mesnatës në Plug të Lushnjës.
Një 65-vjeçar ka hyrë për të vjedhur bagëtitë në një stan me dele dhe është pikasur nga i zoti, ku më pas ata janë përleshur. Personi që ka shkuar për të grabitur ka pasur me vete një armë gjahu.
Gjatë përleshjes është plagosur i zoti i stallës. Ai është dërguar fillimisht në spitalin e Lushnjës e më pas drejt Tiranës. Sipas informacioneve ai ka marrë dëmtime të lehta, ndërsa policia ka shoqëruar autorin.
Njoftimi i policisë:
Menjëherë pas kallëzimit të shtetasit F. M., 66 vjeç, se gjatë natës, sapo një shtetas kishte hyrë për të vjedhur në kasollen në pronësi të tij, ai e kishte konstatuar dhe gjatë konfliktit me të, autori i tentativës për vjedhje e kishte qëlluar me armë gjahu, shërbimet e Komisariatit të Policisë Lushnjë kanë organizuar punën për kapjen e autorit.
Si rezultat i veprimeve të shpejta hetimore dhe policore, u identifikua dhe u kap autori i dyshuar i rastit, shtetasi D. D., 65 vjeç.
I dëmtuari, shtetasi F. M., ka marrë asistencë mjekësore dhe është jashtë rrezikut për jetën. Materialet procedurale iu referuan Prokurorisë së Fierit, për veprime të mëtejshme.
