Partia Demokratike do të nis sot zyrtarisht fushatën elektorale për zgjedhjet parlamentare të 11 majit. Me një skenografi krejt ndryshe nga herë të tjera, ky moment do të paraprihet që prej orës 18:00 nga aktivitetet e të rinjve, njësoj si imazhi i hapjes së fushatës të Presidentit Trump, në qendër të të cilit ishte rinia.
Drejtuesi i fushatës, Chris LaCivita, do të jetë krah Sali Berishës, të cilët do t’u drejtohen shqiptarëve me fjalimet e tyre. Vetë lideri i PD-së dje nuk zbuloi detajet e hapjes së fushatës elektorale, por ai foli për mbështetje të madhe të shqiptarëve për PD-në në garën e 11 majit.
Kreu demokrat u ndal edhe te zhvillimet në Parlamentin Europian, ku tha se komuniteti ndërkombëtar është i vendosur që Shqipëria të bëjë zgjedhje të lira. Seancën dëgjimore të organizuar nga Komisioni i Jashtëm në Parlamentin Europian për Shqipërinë lidhur me zgjedhjet dhe klimën parazgjedhore, kryetari i PD-së, Sali Berisha, i cilëson si kambana alarmi kundër qeverisë “Rama”.
“Në një hark kohor treditor të kenë çështje në agjendën e tyre Shqipërinë, problematikat e saj madhore, zgjedhjet e dhunuara sistematikisht, krimin e organizuar që ka kapur majën e shtetit, terrorin politik dhe shtypjen e opozitës. U shpreh shqetësimi më i madh për industrinë e blerjes së votës të Edi Ramës”, – u shpreh Sali Berisha.
