Kryeministri i Shqipërisë, Edi Rama, ditën e sotme ka firmosur marrëveshjen e bashkëpunimit më kompaninë italiane, e cila është në fushën e industrisë ushtarake.
Nëpërmjet platformës “Facebook”, Rama ka ndarë momentet e nënshkrimit, marrjen në dorëzim të luftanijes e quajtur “Libra”.
“Nënshkruhet nisja e bashkëpunimit mes shoqërisë Fincantier dhe shoqërisë shqiptare ‘KAYO’ për sipërmarrjen e përbashkët në industrinë ushtarake navale, dhe nënshkrimin e Letrës së Qëllimit për kalimin e anijes ushtarake patrulluese “Libra” në përdorim të Forcës Detare Shqiptare”, është shprehur Rama.
Në këtë event ka qenë i pranishëm dhe ministri italian i Mbrojtjes, Guido Crosetto, i cili është shprehur se raportet mes dy shteteve Shqipëri-Itali janë duke përjetuar një fazë pozitive që do të përforcohet dhe me bashkëpunime të tjera.
Ndërkohë në fjalën e tij, kryeministri i vendit ka shprehur vlerësimin për bashkëpunimin mes Italisë dhe Shqipërisë, ndërsa thekson mundësinë e përpjekjeve të reja.
“Kjo është një dëshmi e të gjithë punëve që po bëjmë bashkë dhe dua t’i siguroj të gjithë që kjo është më shumë se aspekti material, sepse po punojmë për të krijuar një sinergji të rëndësishme dhe për të krijuar bashkë një energji të re, për të ecur përpara dhe për të transformuar dhe thelluar edhe më shumë këtë miqësi dhe marrëdhënie mes dy shteteve.
T'i japim mundësi përpjekjeve të reja dhe është shumë e qartë që duhet të bëjmë ç’është e mundur, nuk ka rëndësi nëse je i vogël apo i madh, por besoj se kjo lidhje me Italinë do të thotë edhe më shumë për punën e bërë bashkë. Dua të falënderoj të gjithë skuadrën.
Dua të falënderoj edhe kreun e Ushtrisë italiane për të gjitha dhuratat dhe padyshim për kujtimet e bukura që mora. Është vërtet një kënaqësi dhe shpresoj të jenë të gëzuar me këtë marrëveshje. Ne duhet ta vlerësojmë edhe këtë dhuratë të madhe nga ana e Italisë”, tha Rama.
Gjithashtu edhe ministri i Mbrojtjes, Pirro Vengu ka theksuar se kjo ka qenë një vullnet mes dy vendeve për të bashkëpunuar dhe për të shtuar përpjekjet, për industrinë e mbrojtjes.
