Dita e sotme ishte dramatike për 22-vjeçarin, i cili u rrit në akademinë e Sevillas dhe u bë pjesë e ekipit të parë, duke u kthyer në një emër të kërkuar në këtë merkato. Policia Kombëtare arrestoi Salas, duke e akuzuar për mashtrim për shkak të përfshirjes së dyshuar në një rrjet bastesh të paligjshme. Një gjykatë në Morón de la Frontera, qyteti i lindjes së mbrojtësit në Andaluzia, ka hapur një hetim për të dhe për dy të rinj të tjerë që besohet se janë pjesë e rrethit të tij të ngushtë. Nuk përjashtohet mundësia që të jenë të përfshira edhe më shumë persona.
Salas i ndëshkuar më 24 shtator në ndeshjen Alaves-Sevilla
Arrestimi i lojtarit zgjati vetëm disa orë: pasi dha deklarata para gjykatësit, ai u lirua dhe shkoi në qendrën stërvitore të Sevillas, ku u stërvit me pjesën tjetër të skuadrës të drejtuar nga Garcia Pimienta, që aktualisht renditet e 13-ta në La Liga. Klubi ka shprehur besim te prezumimi i pafajësisë për lojtarin.
Operacioni i së martës u drejtua nga Qendra Kombëtare e Policisë për Integritetin në Sport dhe Bastet, pas një hetimi që zbuloi se Kike Salas kishte marrë kartonë të verdhë me qëllim, për të ndihmuar miqtë dhe familjen të fitonin bastet, duke e ditur më parë se ai do të ndëshkohej.
Shumë kartonë të verdhë të dyshimtë: ndeshjet nën hetim
Hetimi përfshin disa ndeshje të Sevillas nga sezoni i kaluar, veçanërisht ato të javëve të fundit, kur skuadra – duke qenë në një pozicion të sigurt në renditje, pa synime evropiane apo rrezik rënieje – luajti ndeshje pa objektiva sportive të rëndësishme. Kike Salas mori 10 kartonë të verdhë sezonin e kaluar, nga të cilët 7 në 9 ndeshjet e fundit. Hetuesit zbuluan një numër të madh bastesh që parashikonin kartonë të verdhë për të, duke çuar në arrestimin e tij.
Salas është një titullar i rëndësishëm për Sevillan dhe një nga lojtarët më të përdorur nga Garcia Pimienta këtë sezon, si në qendër të mbrojtjes, ashtu edhe si mbrojtës i majtë. Ai sapo kishte rinovuar kontratën me klubin andaluzian deri në vitin 2029 dhe vlerësohej rreth 10 milionë euro. Ditët e fundit, Lazio kishte shfaqur interes për një huazim me të drejtë blerjeje, ofertë e refuzuar nga Sevilla. Megjithatë, tani kjo hije e rëndë rrezikon të ndikojë ndjeshëm në karrierën e tij.
