Ish-futbollisti dhe anëtari i kombëtares ruse, Aleksej Bugaev, ka humbur jetën duke luftuar me ushtrinë ruse në Ukrainë. 43-vjeçari ndodhej në zonën e distriktit ushtarak verior kur humbi jetën në rrethana ende të panjohura. Lajmi, i përhapur nga disa burime informacioni ruse, më pas u konfirmua nga avokati i Bugayev dhe nga babai i tij.
Aleksej Bugaev vritet gjatë luftës në Ukrainë
Një histori mjaft e veçantë është ajo e këtij ish-mbrojtësi, i cili ka dy paraqitje në kampionatet Europiane me kombëtaren e vendit të tij. Avokati dhe agjenti sportiv Anton Smirnov bëri të ditur vdekjen e tij në Telegram, ndërsa babai i tij, Ivan, deklaroi: “Fatkeqësisht, lajmi për vdekjen e Aleksejit është i vërtetë.”
Bugayev ndodhej në radhët e ushtrisë ruse për shkak të një dënimi të rëndë që i ishte shqiptuar në atdhe. Ish-futbollisti ishte dënuar me gati 10 vite burg për trafik droge. Ai ishte kapur në flagrancë në posedim të substancave ilegale që ishin destinuar për shitje. Gjatë gjykimit, Bugayev deklaroi se nuk kishte pasur qëllim t’i shiste ato, por më pas pranoi fajësinë dhe shfaqi pendesë.
Pse Aleksej Bugaev ndodhej në front në Ukrainë?
Megjithatë, kjo nuk e shpëtoi nga dënimi i rëndë. Sipas avokatit të tij, Bugayev vendosi të “shkëmbejë” dënimin e tij me angazhimin në ushtrinë ruse dhe pjesëmarrjen në pushtimin e Ukrainës. Ai shpresonte se kështu do të lirohej më lehtë, por pas tre muajsh situata për të përfundoi në mënyrën më të keqe. Smirnov shpjegoi: “Sipas informacioneve të mia, aktualisht nuk ka asnjë mundësi për të nxjerrë trupin e Aleksejit. Luftimet vazhdojnë.”
Kush ishte Aleksej Bugaev dhe karriera e tij?
Aleksej Bugaev zhvilloi të gjithë karrierën e tij si futbollist në Rusi, duke veshur fanellat e Torpedo Moskës, Tom’ Tomsk, Lokomotiv Moskës, Khimki dhe Krasnodar. Ai ka regjistruar 7 paraqitje me kombëtaren, përfshirë dy ndeshje në Kampionatin Europian të vitit 2004. Pas tërheqjes nga futbolli në vitin 2010, Bugayev nuk arriti të krijonte një profil të rëndësishëm në botën e sportit, duke kaluar më pas në histori të trishta jashtë futbollit.
