Një video e tmerrshme nga brenda avionit që u rrëzua në Kazakistan tregon pasagjerët duke u lutur pak para se ai të përplasej në tokë. Pamjet e filmuara nga një pasagjer tregojnë njerëz të tmerruar duke u lutur ndërsa disa maska oksigjeni janë të ulura.
Në pamje shihen dëmtime brenda bordit me 62 pasagjerë dhe 5 anëtarë të stafit. 38 thuhet se kanë humbur jetën ndërsa 29 kanë shpëtuar megjithëse shumë janë në gjendje të rëndë. Në një tjetër video shihen pamje brenda avionit pas rrëzimit.
Pjesa e pasme mbeti fatmirësisht e paprekur dhe çuditërisht disa persona u gjetën ende të gjallë. Në video dëgjohet një grua e bllokuar që u bërtet ekipeve të shpëtimit: “Më ndihmoni ju lutem!”.
Një zjarrfikës e pyet nëse kishte nevojë për ndihmë për t'u ngritur dhe ajo konfirmon se duhej të nxirrej nga mbeturinat. 22 nga 29 të mbijetuarit po trajtohen në spital, 7 prej të cilëve janë në gjendje të rëndë. Të paktën 10 persona thuhet se kanë vdekur pasi janë hedhur nga kabina kur avioni ishte ende në ajër.
Një tjetër video e frikshme tregon momentin kur avioni shpërtheu në flakë pasi u përplas në tokë. Avioni ishte nisur nga Bakuja e Azerbajxhanit për në Grozni të Rusisë. Kompania “Azerbajxhani Airlines” tha se avioni Embraer 190 kishte “bërë një ulje emergjente” rreth 3 kilometra nga Aktau, një qendër nafte dhe gazi në bregun lindor të Detit Kaspik.
Përpara përplasjes, ekuipazhi raportoi një shpërthim të fortë. Ata supozuan se avioni mund të jetë goditur nga një tufë zogjsh, por tashmë besohet shkak është bërë shpërthimi i një depozite oksigjeni që furnizon kabinën në rast të uljes së presionit.
Ky presion thuhet se shkaktoi çarjen e avionit në dy pjesë. Autoritetet në Kazakistan thanë se kishin filluar të hetonin versione të ndryshme të mundshme të asaj që kishte ndodhur, duke përfshirë edhe një problem teknik.
Dy nga 29 të mbijetuarit janë fëmijë, që besohet se janë vajza të moshës 11 dhe 16 vjeç. Mediat e huaja thonë se të dy pilotët vdiqën nga përplasja dhe nga ekuipazhi vetëm një stjuardesë femër mbijetoi. Autoritetet kazake thanë se 37 pasagjerë ishin nga Azerbajxhani, 16 nga Rusia, 6 nga Kazakistani dhe 3 nga Kirgistani. ©Përgatiti LAPSI.al
