Kreu i Partisë Demokratike, Sali Berisha ka publikuar në rrjetet sociale një audio-regjistrim, të cilin ia ka dërguar një qytetar që sipas tij është bërë në mbledhjen e prindërve në klasën e autorit të vrasjes së 14-vjeçarit tek shkolla “Fan Noli”. Regjistrimi zbardh detaje tronditëse pasi nga diskutimet e prindërve me mësuesit, rezulton se klasa ka qenë e informuar për thikën që posedonte autori.
Sipas qytetarit që ka dërguar regjistrimin, mësuesja ishte në dijeni të konfliktit mes dy adoleshentëve, por gjithsesi i kishte dhënë leje Marios të largohej nga mësimi pas orës së 5-të. Pretendohet se ky veprim i dha mundësinë autorit të përballej me Martinin jashtë shkollës.
“Përgjegjësia juaj ishte që ata fëmijë të mos vinin as orën e 5 e të 6 që kishin marrë leje. Nga e premtja ishte bërë çfarë ishte bërë dhe për zyshën duhet të merren masa, edhe për drejtoreshën. Edhe oficerja. Edhe psikologu ishte në dijeni”, thotë prindi.
Zëri në audio-regjistrim pohon se autori e kishte treguar thikën në klasë.
“Dhe kur gjithë klasa po përpëlitej, ai djali kishte thënë prisni ju çfarë do të ndodhë sot. Dhe vjen me një thikë kaq! Dhe ua ka treguar edhe shokëve”, - dëgjohet në audio.
Në bisedën e regjistruar, prindi i shqetësuar kërkon llogari nga mësuesit dhe drejtuesit e shkollës për këtë neglizhencë. Po ashtu, ai akuzon stafin e shkollës se u kanë sugjeruar fëmijëve të mos flasin me gazetarët apo të japin intervista për ngjarjen.
Berisha e ka shoqëruar publikimin me akuza të forta ndaj drejtuesve të shkollës dhe institucioneve, duke theksuar se konfliktin mes dy të rinjve e dinin jo vetëm mësuesit dhe nxënësit, por edhe psikologu, drejtuesja dhe oficeri i sigurisë. ©LAPSI.al
