Milan feston 125-vjetorin e tij, ngjarja është hapja e ekspozitës fotografike në natyrë “125 vjet Milan”, ku ishin të pranishëm CEO i kuqezinjve Giorgio Furlani, trajneri Paulo Fonseca, Matteo Gabbia dhe presidenti Paolo Scaroni, i cili, duke prezantuar librin përkujtimor të realizuar në bashkëpunim me Assouline, nuk kurseu një thumbim për Inter: “Unë jam nga Vicenca, erdha në Milano për të studiuar në Bocconi. Erdha këtu dhe shpesh humbisja rrugëve, nuk e dija mirë ku ishte San Babila. E të mendosh që pas kaq vitesh jam president i skuadrës së vetme të Milanos, ta themi të vërtetën: në Milano ka vetëm një, të vërtetë. Më jep një emocion të jashtëzakonshëm”, nxiti polemikat Scaroni.
"Po mendoj se kam rreth shtatë vjet si president, jam një president me përvojë të gjatë, kam pasur privilegjin të festoj 120-vjetorin e historisë së Milanit dhe sot 125-vjetorin. Ky libër është i mrekullueshëm, e pashë për herë të parë mbrëmë dhe është një risi edhe për mua. Është plot me fotografi të mrekullueshme që edhe për mua, që e njoh Milan, përfaqësojnë shumë gjëra të reja dhe të bukura. Duhet blerë dhe mbajtur në një vitrinë,” shtoi Scaroni.
FONSECA I HABITUR NGA MADHËSHTIA E MILAN
Pastaj foli Fonseca: “Milan është një klub universal. Kur kam ardhur këtu, ishte e lehtë të kuptohej madhësia e klubit. Ndoshta për tifozët që janë këtu në Itali është e vështirë ta kuptojnë madhështinë, por unë që jam portugez, kam punuar në Ukrainë dhe Francë, është e jashtëzakonshme madhësia e këtij klubi. Ka shumë tifozë të Milan edhe në Ukrainë, Portugali dhe në shumë shtete të tjera. Ndonjëherë nuk e dimë vërtet madhësinë e Milan”.
Në fund foli Gabbia, i cili ndau ndjesitë që kishte ndjerë ditën kur ekipi fitoi titullin e 19-të kampion: “Patjetër ishte një moment fantastik, një moment që do të lidhë të gjithë ata që bënë pjesë në atë skuadër. Ishte një moment shumë i bukur, por edhe dita para ndeshjes, udhëtimi që na çoi në Reggio Emilia me tren, mbërritja në qytet ku na prisnin shumë tifozë. Në ditën e ndeshjes, në stadium erdhën tifozët dhe ishte vërtet një det i kuq dhe zi. Është një kujtim që nuk do ta harrojmë kurrë dhe që do të na bashkojë gjithmonë. Dhe do ta mbajmë përherë brenda nesh". Pastaj për sezonin aktual: “Duhet shumë angazhim dhe ndoshta edhe pak kohë. Por jemi në rrugën e duhur, kemi vullnetin 100% për të munduar të shkruajmë historinë si ata që hyjnë në legjendë”.
