Probleme shëndetësore për trajnerin e Lacios, Marco Baroni. Pas fitores në Monza, që i ngjiti bardhekaltrit në vendin e dytë në klasifikimin e Serie A, trajneri Marco Baroni kishte vendosur të kalonte një të hënë relaksi me familjen, por ai u përball me një shqetësim shëndetësor që e çoi në spital.
61-vjeçari toskan, fitues së fundmi i çmimit për trajnerin më të mirë të muajit në kampionatin më të lartë italian, ndodhej në Gubbio, në Umbria, dhe u ndje keq ndërsa po drekonte në një restorant të njohur në qendër (Osteria Cernicchi në Piazza San Martino). Gjatë drekës, ai ka ndjerë dhimbje të forta në bark, çka ka shtyrë të pranishmit të thërrasin ndihmën e shpejtë. Ambulanca ka ardhur menjëherë dhe e ka transportuar në spitalin e Branca, që ndodhet pranë, ku ai ka kaluar të gjithë kontrollet mjekësore të nevojshme.
Pas ekzaminimeve, është zbuluar se bëhej fjalë për një ngërç abdominal, shkaktuar nga një virus influenze ose për shkak të ndryshimit të temperaturës. Pas diagnozës dhe trajtimit të shpejtë të problemit shëndetësor që e kaploi papritur gjatë drekës, Marco Baroni doli nga spitali në mbrëmje. Ai u kthye në Romë me familjen e tij dhe, nëse gjendja e tij shëndetësore do të lejojë (siç ka njoftuar ai vetë, sipas "Messaggero"), do të udhëhoqë stërvitjen e Lacios të mërkurën në Formello, edhe pse do të ketë mungesa për shkak të grumbullimeve të lojtarëve me kombëtaret. Pra, ishte vetëm një shqetësim i vogël shëndetësor për trajnerin toskan, por që i prishi ditën e tij të relaksit me familjen.
NJOFTIMI I KLUBIT PËR GJENDJEN E TEKNIKUT BARONI
Për të sqaruar situatën dhe për të qetësuar të gjithë lidhur me gjendjen e trajnerit toskan, ka dalë edhe një njoftim zyrtar nga Lazio, i cili thotë: "S.S. Lazio njofton se dje, pas një shqetësimi të vogël shëndetësor që përjetoi ndërsa ishte me familjen e tij, trajneri Marco Baroni shkoi në spitalin lokal të Gubbio për një kontroll. Kontrolli ka rezultuar negativ, pasi bëhet fjalë për një formë të lehtë të gripit që kishte goditur edhe disa anëtarë të tjerë të klubit në ditët e fundit. Prandaj, tekniku Baroni do të jetë në stërvitje nga nesër (e mërkurë, 13 nëntor, red.) dhe do të udhëheqë ekipin normalisht në rikthimin e stërvitjeve".
