Qeveria miratoi në mbledhjen e kësaj të mërkure vendimin për një shtesë fondi në buxhetin e vitit 2024, për zgjedhjet e 2025-ës.
Ky fond do t’i jepet Komisionit Qendror të Zgjedhjeve.
Qeveria i ka akorduar KQZ-së një shtesë prej 20 900 000 lekësh për mbulimin e shpenzimeve përgatitore, që i paraprijnë zgjedhjeve parlamentare të vitit 2025.
“Komisionit Qendror të Zgjedhjeve, në buxhetin e miratuar për vitin 2024, në programin 01610 “Planifikim, menaxhim, administrim”, i shtohet fondi prej 20 900 000 (njëzet milionë e nëntëqindmijë) lekësh, në zërin “Shpenzime korrente”, për mbulimin e shpenzimeve përgatitore, që i paraprijnë zgjedhjeve për Kuvendin, të vitit 2025.
Efekti financiar, sipas pikës 1, të këtij vendimi, përballohet nga fondi rezervë i buxhetit të shtetit, miratuar për vitin 2024.
Ngarkohen Ministria e Financave dhe Komisioni Qendror i Zgjedhjeve për zbatimin e këtij vendimi”, thuhet në vendim.
Më herët, KQZ ka bërë kërkesë pranë Ministrisë së Financave për një fond ekstra për zgjedhjet e 2025-s me një total afro 4.6 miliardë lekë për teknologjinë në proces, për shtimin e pajisjeve për votim-numërim-identifikim elektronik, si dhe për shpërblimin e anëtarëve të KZAZ-ve, KQV-ve, GNV-ve dhe trajnuesve të tyre, si dhe për punonjësit e përkohshëm.
