Prokuroria e Posaçme mori të pandehur deputetin e Partisë Socialiste, Plarent Ndreca për shkelje të barazisë në tendera lidhur me rikonstruksionin e 4 komisariateve në vend, në kohën kur ai ishte sekretar i Përgjithshëm i Ministrisë së Brendshme. Ndreca qëndruar në këtë post nga korrik 2019 deri shtator 2020.
Kallëzimi në SPAK u bë nga Kontrolli i Lartë i Shtetit për ndërhyrjet në Komisariatet e Vlorës, Mirditës, Pogradecit dhe atij nr. 4 në Tiranë.
Po ashtu, ka pasur edhe rritje të paargumentuar të vlerës së kostove të ndërtimit dhe kostove të projektimit në procedurën e prokurimit. Procedurat janë kryer kur Ministria e Brendshme drejtohej nga Sandër Lleshaj.
Por disa ditë më parë, Ndreca e mohoi kallëzimin gjatë një bisede në studion e Opinion, kur kreu i grupit opozitar, Gazment Bardhi i dërgoi një mesazh drejtuesit të emisionit. Sot, pasi Ndreca u mor u pandehur, Bardhi e akuzon Ndrecën se “gënjeu publikisht”.
Reagimi i Gazment Bardhit:
“Deputeti i Edi Ramës gënjeu publikisht, kur deklaroi se është e pavërtetë që është nën hetim nga SPAK. Por, gënjeshtra mbulon zullumin vetëm për disa orë apo ditë, por e vërteta triumfon përgjithmonë!
E vërteta është që tenderat publik në Qeverinë e Edi Ramës janë kthyer në mundësi vetëm për klientë të paracaktuar, duke eleminuar garën dhe meritokracinë. Klientelizmi dhe korrupsioni janë e vetmja formë për të bërë biznes në Shqipëri gjatë qeverisjes së Edi Ramës.
Për këtë nevojiten zyrtar publik si Plarent Ndreca, që për shërbimet në shkelje të ligjit, për mbështetjen ndaj klientelizmit dhe korrupsionit, shpërblehen nga Edi Rama duke u promovuar si deputet!”.
