Nga një qen me dy koka, tek një njeri pa kokë. Janë objekte të çuditshme që njerëzit “i kanë gjetur” në Google Maps. Megjithatë, pamja e fundit është padyshim një nga më të çuditshmet deri më tani. Një "derë" misterioze është parë në Antarktidë, në juglindje të stacionit Showa të drejtuar nga japonezët. Zbulimi ka ndezur një sërë teorish në të gjithë internetin. Ka nga ata që thonë se ajo është shtëpia e pushimit të Bigfoot ose një anije nga Star Trek.
Megjithatë shkencëtarët kanë zbuluar se çfarë është kjo strukturë në të vërtetë dhe thonë se ka një shpjegim të thjeshtë. Struktura e pazakontë u pikas nga një përdorues i Reddit në Google Maps në pozicionin 69°00'50"S - 39°36'22"E.
Ai shkroi: “Një derë masive në Antarktidë? Postimi tërhoqi vëmendje të madhe, me qindra shikues që u grumbulluan në komente për të diskutuar se çfarë mund të ishte struktura. Një përdorues sugjeroi se ishte “dera për në Agartha” ndërsa një tjetër pretendoi se mund të ishte një “magazinë e madhe farash si ajo në Svalbard në Norvegji”.
Në fakt shpjegimi i vërtetë i strukturës është shumë më pak emocionues sesa mund t'ju bëjnë të besoni këto teori. Profesor Bethan Davies, një profesor i Glaciologjisë në Universitetin e Newcastle, pa koordinatat në Google Earth Pro dhe bëri krahasimin e tyre.
“Ky është një ajsberg që u ka ngecur dhe tashmë është mbërthyer dhe po shkrihet në atë vend. Ju mund të shihni shumë ajsbergë të tjerë në atë zonë” – tha Davies.
“Kjo është thjesht një rrjedhë akulli rreth një pengese të fortë nënglaciale, e ndikuar gjithashtu nga shkrirja dhe ngrirja e sërishme e akullit dhe nga erërat katabatike. Akulli është mjaft i hollë këtu, siç dëshmohet nga daljet e tjera të shkëmbinjve aty pranë, kështu që ndikimi i shtratit në rrjedhën e akullit do të jetë i fortë. Është një model interesant, por jo i pazakontë apo befasues nga ana glaciologjike” – shtoi ai.
Ndërsa profesori John Smellie, një vullkanolog në Universitetin e Leicesterit, tha me shaka: 'Çfarë do të bënim pa teoricienët e konspiracionit? Rezultati nuk është i pëlqyeshëm për ta. Unë nuk e njoh atë zonë, por mua më duket si një kreshtë e shkurtër shkëmbore që është zhvarrosur për shkak të një uljeje të akullit. Jam shumë i sigurt se është thjesht një fenomen natyror dhe asgjë për t'u emocionuar" – tha ai. ©LAPSI.al
