Po dalin detaje gjithnjë e më tronditëse mbi grupet ultras të Milanos pas arrestimeve të fillimit të javës. "Il Fatto Quotidiano", në një artikull të shkruar nga Davide Milosa, tregon se si lufta për udhëheqjen e Curva Nord të Interit kishte arritur në nivele të paimagjinueshme. Aq sa ishte planifikuar vrasja e njërit prej shefave, Andrea Beretta, trupi i të cilit duhej të zhdukej. Për këtë arsye ishte blerë gëlqere e pashuar.
Beretta, pasi mësoi për planin kundër tij, i zgjidhi personalisht llogaritë me rivalin e tij, Antonio Bellocco, duke e vrarë atë në Cernusco sul Naviglio më 4 shtator.
PLANET PËR TË VRARË SHEFIN ULTRAS BERETTA
Gjatë muajit gusht, në një takim mes përfaqësuesve të Curva Nord, u vendos të eliminohej Beretta, i cili ishte fajësuar se nuk po ndante të ardhurat nga shitja e produkteve të tifozëve më të zjarrtë të Inter. Fillimisht, plani përfshinte ta tërhiqnin atë në një fermë me pretekstin e një borxhi për t’u ndarë. Ky plan më pas u braktis. U mor parasysh një opsion tjetër: ta trullosnin me një substancë gjatë një darke dhe më pas ta qëllonin. Më pas, ta zhduknin trupin. Për këtë qëllim, u ble gëlqere e pashuar në një qendër tregtare. Kur kasierja u bë kureshtare për blerjen, u justifikua me pretendimin se gëlqerja ishte për varrosjen e një qeni.
BERETTA ZBULON TË GJITHA DHE HAKMERRET
Megjithatë, dikush e paralajmëroi Berettën për lëvizjet e rivalëve dhe shefi ultras i Inter u përgatit me një thikë dhe një pistoletë. Të vrasësh ose të të vrasin. Beretta zgjodhi opsionin e parë dhe më 4 shtator i zgjidhi llogaritë me Bellocco në mëngjesin e përgjakshëm të Cernuscos. Ai që e paralajmëroi Beretta, që tani është në izolim në burgun e Operas, është identifikuar nga hetuesit. Megjithatë, personi në fjalë ka mohuar gjithçka. Por, sipas "Il Fatto Quotidiano", ai tashmë është në shënjestër të klanit të Rosarno, me të cilin Bellocco kishte lidhje.
