Presidenti Bajram Begaj nuk shkoi vetë në Kuvend në seancën për hapjen e sesionit të ri. Letrën e tij e kishin shpërndarë shërbimet e Kuvendit në të gjitha tavolinat e deputetëve.Kjo ngjalli edhe reagimet e deputetëve të opozitës të cilët në shumë raste e kanë parë kreun e shtetit si shtojcë të mazhorancës. Disa deputetë grisën në shenjë demonstrative letrën e kreut të shtetit. Në letrën dërguar Kuvendit, Begaj bën thirrje për bashkëpunim mes palëve në të mirë të vendit.
"Një çështje që ka të bëjë sa me integrimin evropian, aq edhe me zhvillimin e vendit, është lufta kundër korrupsionit dhe krimit të organizuar, një element që fatkeqësisht po kthehet në refrenin e gjithhershëm të çdo fjalimi.
Parlamenti duhet të mbështesë plotësisht reformën në drejtësi, institucionet tona të drejtësisë dhe agjencitë e zbatimit të ligjit, duke forcuar kapacitetet e tyre financiare, njerëzore dhe infrastrukturore.
Inkurajoj Kuvendin të promovojë politikën e antikrimit dhe antikorrupsionit si një përballje reale me një të keqe që duhet ta luftojmë në çdo nivel e çdo fushë të këtij fenomeni gërryes për ekonominë dhe kërcënues për demokracinë", thuhet mes të tjerash në letrën e kreut të shtetit.
