Ishte një mbrëmje e ftohtë në fund të janarit 2021: në Udine, Inter nuk ishte në gjendje të zhbllokonte rezultatin dhe trajneri Antonio Conte ishte nervoz për disa vendime të arbitrave. Në heshtjen e stadiumeve të zbrazëta për shkak të Covid, u dëgjua shumë qartë fraza e trajnerit leçez drejtuar arbitrit të ndeshjes, që i tregoi kartonin e kuq: “Je gjithmonë ti Maresca, je gjithmonë ti”. E sot është personi i përfshirë drejtpërdrejt, Fabio Maresca, i cili komenton me ironi atë që ai vetë e përkufizoi si “një meme që më shoqëron për vite me radhë”.
I intervistuar nga Corriere della Sera, Fabio Maresca komentoi pikërisht atë episod: "Është një meme që ka vite që më shoqëron. Më pëlqen. E sqaruam menjëherë, kështu që i përket së shkuarës", tha arbitri. Duke qenë se Conte është rikthyer në Serie A, në stolin e Napolit, të dy janë të destinuar të takohen sërish dhe, siç dëshiron të sqarojë arbitri, do ta bëjnë këtë pa mëri. “Do të jetë kënaqësi ta gjej sërish përballë, sepse është një trajner elitar që pasuron kampionatin italian”, shpjegoi Maresca.
Lexo më tej: "Je gjithnjë ti Maresca. Edhe në Var je gjithnjë ti, bravo": skualifikim shembullor për Conte, për fyerje ndaj arbitrit
Vetë Maresca e gjen veten të pasojë trashëgiminë e Daniele Orsato, i cili vitin e kaluar arbitroi ndeshjen e tij të fundit në kampionat dhe përfundoi karrierën e tij në Kampionatin Evropian: "Një nder. Mungesa e tij do të peshojë sepse ai ishte jo vetëm më i miri, por edhe kapiteni ynë. Falë tij jemi rritur, sot jemi një grup i ri, por i fortë. Le të themi që nuk ka më një kapiten, por një ekip kapitenësh dhe secili mban peshën që mundet", tha Maresca.
Duke folur për rolin e arbitrit, Maresca iu rikthye edhe episodit të fishkëllimave raciste në Udine ndaj portierit të Milan, Maignan: "Thjesht u solla si vëlla më i madh. Arbitri sot nuk mund të jetë thjesht arbitër, por duhet të kuptojë të gjithë kontekstin dhe çfarë ndodh rreth fushës. Shoqëria është më komplekse, si futbolli. Lufta kundër racizmit duhet të përfshijë të gjithë, duke përfshirë edhe ne arbitrat".
