Dita e katërt e zjarrit në Malin e Tomorit, situata drejt mbylljes. Në zonë mbizotëron ngado tymi, që vijon në trungjet e tharë dhe vetëm një vatër është aktive në zonën e pllakave, pas asnjë rrezik përhapjeje të zonës. Sipas përllogaritjeve, zjarri ka përshkruar një sipërfaqe rreth 22 ha dhe raportohet e djegur 9 ha.
Gazetarja Eneida Petova raporton se vijon që prej mëngjesit të së hënës zjarri në Malin e Tomorrit në Skrapar. Pas izolimit nga zjarrfikësit të vatrave aktive të zjarrit pasditen e djeshme në zonën e Bozhanit, u shmang përfundimisht përhapje e flakëve drejt Parkut Kombëtar të Tomorit dhe territorit të Çukës, ku do tē fillojë pas pak ditësh edhe Peligrinazhi i përvitshëm i bektashinjve.
Ditën e djeshme u bë edhe përforcimi i periferisë rreth zjarrit, duke shuar çdo gjurmë në zonat kufitare. Kjo bëri që zjarri të mos dilte jashtë këtij perimetri. Edhe pse, ende edhe sot në zonë ka vatra zjarri ende aktive në trungjet e tharë dhe të rrëzuar si dhe tym ngado, tym që del nga vatrat ende aktive dhe të nxehta, sitiata po mbahen në monitorim, deri në eliminimin e plotë të zonave ende të nxehta. Aktualisht është aktive vetëm një vatër e vogël zjarri dhe kjo në rrëzë të shkëmbit mbi Bozhan, por pa asnjë rrezik përhapjeje.
Lexo më tej: Zjarri në Bulqizë shkakton dëme kolosale, banorët kërkojnë ndërhyrje nga ajri
Zjarri, që mendohet të ketë qenë i qëllimshëm, u shfaq fillimisht ditën e hënë në hyrje të Parkut Kombëtar por i favorizuar nga era dhe temperaturat e larta ai u përhap me shpejtësi drejt pyllit me pisha dhe më pas drejt zonës lindore të Çukës,shumë pranë vendit ku zhvillohet peligrinazhi i përvitshëm i bektashinjve. Terreni tejet i vështirë e bëri të pamundur futjen e mjeteve zjarrfikëse në zonën e zjarrit dhe kjo situatë bëri që të vijohej të punohej për fikjen e flakëve me mjete rrethanore dhe pompa uji shpine.
Për këtë situatë të rënduar zjarri, në Malin e Tomorrit janë angazhuar prej 4-ditësh 18 punonjës të Agjensisë Rajonale të Zonave të Mbrojtura, 27 efektivë zjarrfikës nga Skrapari, Berati e Poliçani, 30 forca të ushtrisë dhe banorë të zonës.
Sipas përllogaritjeve të bëra, zjarri ka përshkruar një sipërfaqe rreth 22 hektarësh, ndërkohë që raportohet e djegur një sipërfaqe prej 9 hektarësh, pjesa më e madhe me dru të thatë e boçe pishash të rrëzuara, ndërkohë që shifrat zyrtare të dëmeve të shkaktuara nga ky zjarr do të dalin në mbylljen e tij të plotë.
Burimet zyrtare nga DVP Berat konfirmojnë se, duke dyshuar se zjarri ka qenë i qëllimshëm, po punohet për zbardhjen e plotë të shkaqeve të tij dhe vënien përpara përgjegjësisë ligjore të autorëve, nëse konfirmohet se ka qenë i qëllimshëm.
