I mundur në shtëpi e tani i pashpresë se mund t'i shpëtojë rënies. Matematika e mban ende në lojë, por me 12 pikë në lojë dhe 11 pikët e distancës që e ndan nga zona e playout, asgjë nuk mund të ndryshojë fatet katastrofike të sezonit të Kukësit. Veri-lindorët janë dorëzuar 0-2 ndaj Skënderbeut, që afrohet me vendin e katërt, duke premtuar luftë deri në fund. Vendosi Rashica me një dygolësh, që vrau dëshirën për të reaguar të vendasve.
Lexo më tej: Video/ Tirana e katërta, presion para derbit: penalltia e Abazajt e supergoli i Jonuzit fundosin Erzenin
Në një sfidë të luftuar, duke qenë se të dy skuadrat kërkonin pikë për objektivat e tyre, skenën e mori sulmuesi 20-vjeçar. Rashica zhbllokoi ndeshjen në minutën e 32' me penallti. Moment shumë i rëndësishëm, duke qenë se 15 minuta më parë, Hasaj kishte goditur shtyllën për vendasit. Asgjë për tu shënuar në pjesën e mbetur të lojës, deri kur skuadrat shkuan në pushim në dhomat e zhveshjes.
Video/ Goli me penallti i Rashicës
Kukësi tentoi të ngrinte xhirot, por duhet të bënte llogaritë me sulmuesin e Skënderbeut. Rashica në minutën e 68' të ndeshjes shënoi edhe golin e dytë, që mbylli takimin. Kukësi vetëm në minutën e 87′ arriti të gjejë rrugën e rrjetës, por jo më parë se të sinjalizohej për pozicion jashtë loje. Fejzaj goditi tokazi në krahun e djathtë të portës duke mposhtur portierin Aliaj, por goli nuk ishte i vlefshëm.
Kukësit qëndron në vendin e fundit dhe në rast fitore të Teutës do të jetë i rënë matematikisht. Skënderbeu ngjitet në vendin e gjashtë, vetëm 2 pikë larg Tiranës që momentalisht është e katërta, në pritje të derbit Partizani-Dinamo.
