Arbitrat janë ata që shpesh e gjejnë veten në qendër të polemikave. Ndonjëherë për meritë të gabimeve të veta e ndonjëherë për pakënaqësi të klubeve. Këtë herë, megjithatë, ka qenë momenti për tu vlerësuar për një vit impenjativ. Asambleja e Përgjithshme e Zakonshme e Bashkimit të Arbitrave Shqiptarë të Futbollit (BASHF), zhvilloi punimet në prezencë edhe të Sekretarit të Përgjithshëm të FSHF-së, Ilir Shulku.
Në përshëndetjen e tij, Shulku vlerësoi punimet e asamblesë dhe përgëzoi rritjen e nivelit të arbitrimit shqiptar. “Ju përgëzojë për asamblenë e parë vjetore të përgjithshme të zakonshme. Është një hap i parë që shoqata ka filluar të funksionojë në mënyrë perfekte. Falë gjykimit tuaj, niveli i arbitrimit shqiptar dhe niveli i futbollit shqiptar janë me notë shumë pozitive. Dua t’ju përgëzoj për gjykimin që keni bërë gjithë këto vite dhe vazhdoni ta bëni. Gjithashtu, ju përgëzoj edhe për punën që bëhet në të gjitha kolegjiumet dhe në kryesi, sepse këtë e tregojnë faktet. Kemi rritur numrin e arbitrave ndërkombëtarë dhe kjo tregon që arbitrimi shqiptar është në rrugën e duhur dhe ka hapa shumë pozitiv”, – tha Sekretari i Përgjithshëm i FSHF-së, Ilir Shulku.
ÇMIMET E SHPËRNDARA
Gjatë Asamblesë morën çmime vlerësuese Besnik Kaimi, Kridens Meta, Xhavit Zajmi, Mhill Shkëmbi, Pajtim Aliko dhe Denis Agaraj, për kontributin e dhënë në arbitrimin shqiptar. Pikërisht Meta u vu në qendër të polemikave në fund të kampionatit të kaluar, ku Tirana e akuzoi se i humbi titullin, me penalltinë e dhënë në favor të Bylis. Siç duket ky fakt nuk ka qenë mjaftueshëm për ta penalizuar arbitrin, përkundrazi.
Në punimet e kësaj Asambleje të parë të Zakonshme u morën edhe dy vendime të rëndësishme. Me anë të votimit u miratua bilanci financiar i vitit 2023 dhe projektbuxheti për vitin 2024. Pas miratimit të këtyre vendimeve u mbyllën punimet në Asamblenë e Përgjithshme të Zakonshme të BASHF-së.
