Portieri i PSG-së Sergio Rico ishte viktimë e një aksidenti të rëndë me kalë, pas të cilit ai kaloi një periudhë në koma. Rezerva e pariseinëve iu nënshtrua operacioneve të ndryshme kirurgjikale. 82 ditë pas aksidentit Sergio Rico tashmë ka dalë nga spitali dhe tani do t'i nënshtrohet një periudhe pushimi dhe vëzhgimi. Portieri spanjoll dukej shumë i emocionuar në shoqërinë e bashkëshortes së tij Alba Silva, gjithmonë e pranishme dhe zëri social i portierit muajt e fundit.
ÇFARË NDODHI
Pasi fitoi titullin kampion me PSG, portieri u nis për pushime në Spanjë. Aty Rico u rrëzua nga kali dhe më pas u shkel prej tij gjatë një pelegrinazhi. Sipas rindërtimit të ngjarjes, portieri rezervë i PSG u rrëzua nga kali dhe u godit nga kafsha dhe një karrocë e tërhequr nga disa mushka. Në përshkrimin që i kanë bërë mjekët aksidentit është zbuluar një detaj i frikshëm: “Nëse plaga do të kishte qenë më e thellë se gjysmë centimetri, Sergio do të kishte vdekur në çast”.
Menjëherë pas aksidentit, portierit të PSG iu dha ndihma mjekësore. Sidoqoftë kjo nuk shmangu ditë të tëra në koma. Lufta e mjekëve pastaj bëri që – fatmirësisht – portieri të dilte jashtë rrezikut për jetën. Në periudhën e qendrimit në spital Sergio Rico ka humbur tashmë 23 kilogramë.
MESAZHI I PARË KUR DOLI NGA KOMA
Ishte 28 maji kur, jo shumë larg Seviljes, portieri i Paris Saint Germain Sergio Rico u dërgua me urgjencë në spital. Ai pësoi një rënie të keqe nga kali, një ditë pasi ishte shpallur kampion në Ligue 1. Në koma dhe i intubuar, portieri spanjoll kaloi 36 ditë në terapi intensive. Pasi u rrezikua seriozisht jeta e tij, Rico rikuperoi dalëngadalë, derisa u zgjua plotësisht. Në atë moment, përmes profilit të tij në Instagram erdhën edhe fjalët e para.
Lexo më tej: Sergio Rico, portieri i PSG që u shkel nga kali, sërish në operacion: duhet hequr një aneurizëm
Portieri i PSG, Sergio Rico, është shtruar në spitalin e Seviljes që prej 28 majit. Me 20 kg më pak dhe humbjen e 30% të masës muskulore, portieri mundi të qetësojë të gjithë fansat e tij përmes një mesazhi emocionues të postuar në një histori në Instagram. "Falënderoj të gjithë ata që më kanë treguar dashurinë e tyre në këto ditë të komplikuara”, ka shkruar lojtari spanjoll. “Unë jam duke u përmirësuar vazhdimisht. Ndihem shumë me fat dhe shpresoj t’ju shoh përsëri së shpejti”. Një mesazh që i jep fund një makthi. Edhe pse për momentin kthimi i tij në fushë është totalisht i përjashtuar.
