Partizani e Tirana janë dy skuadrat e vetme shqiptare që vazhdojnë rrugëtimin në Conference League. Tani dy kryeqytetaset kanë njohur edhe kundërshtarët me të cilët do të ndeshen në raundin e tretë të kompeticionit. Në fakt, në Nyon, goglat kanë qenë të favorshme për të kuqtë, diçka më pak për bardheblutë.
Për Partizanin një rrugë e shtruar drejt playoff, sepse edhe në raundin e dytë skuadra e Zekic do të luajë ndaj një rivali të thjeshtë në letër. Nesër në orën 17.00 Partizani do të luajë kundër Atletic Escaldes në Andorra. Nëse në sfidën e dyfishtë, Zekic e lojtarët e tij kualifikohen, do të ndeshen në raundin e tretë me fituesin e sfidës Tre Penne-Valmiera. Cilido qoftë fituesi, të dy janë kundërshtarë në dukje të lehtë. Tre Penne është skuadra e kampionatit të San Marinos, ndërsa Valmiera është skuadër letoneze.
Lexo më tej: Koeficient dhe arkëtim, ja çfarë luan Partizani në Andorra: programi i të kuqve ndaj Atletic Escaldes
Nga ana tjetër për bardheblutë nuk mund të thuhet e njëjta gjë, edhe sepse në raundin e dytë Orges Shehi e të tijtë duhet të luajnë me Besiktas. Pengesa e madhe e bardhebluve është pikërisht gjiganti turk. Por nëse, Tirana e bën mrekullinë duke eliminuar Besiktas, atëherë përballë do të ketë fituesin e sfidës FK Željezničar-Neftchi Baku. Si sarajevasit ashtu dhe azerët janë kundërshtarë që mund të hapin probleme. Gjithsesi, në Nyon, Tirana shpëtoi mirë pa rënë nga shiu në breshër, sepse evitoi përplasjen me Hajduk Split. Sfidat e turit të tretë të Conference League do të luhen më 10 gusht. Ndërsa takimet e kthimit janë programuar më 17 gusht.
