Vazhdimësia nuk është dicka që në Shkodër e njohin, ndoshta e quajnë rutinë. E në qytetin verior është një gjë që e shmangin me cdo kusht. Por kur flitet për futboll, kjo kthehet në problem. E pas dy fitoreve radhazi, 0-0 e marrë në Rrogozhinë ndaj Egnatias i bëri prapaktheu me pasojë arratinë e re të Tiranës. Një problem më shumë është mungesa në listën e golashënuesve të Bekim Balaj.
Shkodranët nuk arritën të shënonin në transfertë, pasi kishin luajtur tre ndeshje radhazi në Loro Borici. Por nuk është ky fakti shqetësues sa ai që në listën e golashënuesve vazhdon të mungojë njeriu që është thirrur në çështje të zgjidhte situatat para portës. Bekim Balaj regjistron ndeshjen e shtatë mes kampionatit e Kupës që nuk shënon. E kjo gjë po kthehet në një sindromë të vërtetë për sulmuesin shkodran e për vetë skuadrën madje. Klubi shpresonte të kishte gjetur njeriun e golit, pasi në vitet e fundit nuk ishin bindur nga Dunga, Dilaver, Aralica, Kaina Nunes. Por deri tani Balaj është larg nga të qenit Bekim në Shkodër dhe shenjën e vetme ka lënë penalltinë e fituar në Klasiken me Tiranën.
Në rregull, është e kuptueshme që duhet kohë përshtatje pas 11 vjetësh mungesë në fushat e Superiores. Çështja është se Vllaznia nuk ka kohë. Është në garë për titullin dhe për të parakaluar Tiranën e Partizanin ka nevojë edhe për golat e Balaj. 32 vjeçari ka humbur takimet me golin kundër Laçit në debutim. Pastaj në humbjet me Bylis e Erzenin, barazimin me mallkastriotët në Kupë. E në fund edhe dy fitoret me Kukësin e Tiranës. Kundër Rrogozhinës sulmuesi shpreson të ketë qenë e fundit. Por më shumë se vetë ai e shpresojnë në Shkodër ku për titullin shpresat i kanë varur mbi të gjithë te ai…
