Historia e dashurisë mes Nicolò Zaniolo dhe Romës përfundon në mënyrën më të keqe të mundshme. E ndoshta cështja do të përfundojë në gjykatë. Tashmë merkato është mbyllur dhe lojtari, i cili kishte kërkuar transferimin, mbeti në kryeqytet. Ai refuzoi Bournemouth, duke shpresuar te Milan, ndërsa tani u përjashtua nga projekti teknik. Vendimi për ta lënë Zaniolo jashtë ishte unanim, i trajnerit Mourinho dhe presidentit Friedkin. Mes çmendurisë së ditëve të fundit, me tifozët që e kërcënuan në shtëpi dhe ikjes në Spezia, sipas Il Messaggero, sulmuesi po përgatitet të padisë klubin verdhekuq.
Sipas gazetës romane, stafi i futbollistit tashmë ka kontaktuar një grup avokatësh për t'u marrë me këtë çështje. Akuzat e supozuara janë ato të mobbing dhe presioni psikologjik ndaj futbollistit. Për më tepër, Assocalciatori, i kryesuar nga Umberto Calcagno, gjithashtu është informuar.
Lexo më tej: Zaniolo kërcënohet poshtë shtëpisë, ikën me vrap dhe e ndjekin: policia e merr në mbrojtje
STAF LIGJOR E AKUZA PËR MOBBING
Sipas familjes së futbollistit, masakra mediatike ku u përfshi Nikolo në ditët e fundit është shkaktuar nga Roma. E stafi i tij ka ndërtuar një dosje që mbledh ngjarjet e ndodhura ditët e fundit. Bëhet fjalë për pankartat, frazat kundër nënës dhe familjes e kërcënimet.
Hipoteza e një mosmarrëveshjeje ligjore mbetet në këmbë, por futbollisti do ta ketë të vështirë të marrë diçka. Para pak ditësh Mourinho tha se ishte vetë lojtari që e quajti veten jashtë: “Nuk ka dashur të luajë prej një muaji, ai dëshiron të largohet, më kërkon të mos e grumbulloj”. E këtë frazë askush nuk e ka mohuar. As nëna e tij, Francesca Costa, e cila tha dje se Nikolo është i madh dhe di të mbrohet.
Nëse, nga ana tjetër, nëse cështja shkon vërtet deri në gjyq, lojtari mund të marrë edhe zgjidhjen e kontratës. Por ndërkohë do t'i jetojë këta muaj si i ndarë në shtëpi dhe do të humbasë edhe fanellën e kombëtares. Siç shkruan Il Corriere dello Sport, Zaniolo i rikthyer në kryeqytet do të stërvitet në Trigoria në ditët në vijim. Por në orare të caktuara dhe ndryshe nga ato të pjesës tjetër të skuadrës.
