Federico Chiesa dëshiron të rikuperojë gjithçka pas një viti të tmerrshëm, me dëmtimin e rëndë që e mbajti larg fushës për më shumë se 7 muaj. “Në vitin 2023 pres të luaj vazhdimisht. Qëllimi është të rikthehem në formë dhe të gjej minutazhin tim”. Kundër Monza, anësorit iu desh tërhiqej për probleme fizike. Tani është plotësisht i disponueshëm për çerekfinalet e Kupës së Italisë kundër Lacios, të enjten në mbrëmje.
"Fatkeqësisht, ndeshjen e fundit e humba për shkak të një lodhje muskulare. Por jam mirë pas një dëmtimi të gjatë – shpjegoi ai për ANSA –. E më duhet të them se ndihem mirë fizikisht. Nuk mund të jap përqindje, vetëm fusha do ta tregojë kur të jem në super formë. Megjithatë, që në Napoli e kam nisur nga minuta e parë”.
KEQARDHJA PËR KOMBËTAREN ITALIANE
Ai kishte lënë një Juventus që luftonte për Champions League dhe një kombëtare kampione Europe. Tani bardhezinjtë janë zhytur në probleme ligjore me një klasifikim që nuk ka qenë kurrë kaq i keq: “Duhet të synojmë të arrijmë objektivat tona - tha Chiesa -. E me Juven duhet të marrim sa më shumë pikë, duke menduar për ndeshjet me radhë. Ndërsa me Italinë synojmë Kampionatin Evropian 2024”.
Pikërisht kombëtarja i ka lënë atij një nga keqardhjet më të mëdha të vitit. Chiesa nuk ishte i gatshëm për shkak të dëmtimit të rëndë në gju: “Ndeshja që do të kisha dashur të luaja me çdo kusht është ajo kundër Maqedonisë. Do doja shumë të jepja një dorë për shokët e skuadrës, por fatkeqësisht nuk ishte e mundur”.
Megjithatë, jo gjithçka e keqe vjen për të bërë keq: “Jam rritur në nivel njerëzor dhe mendor. Ky dëmtim të vendos përballë kaq shumë pengesave, që nuk i kisha hasur kurrë më parë”, zbuloi 25-vjeçari.
