Lajmi për penalizimin e Juventus në rastin e fitimeve kapitale po krijon debate jo vetëm në Itali. Historia mori një mbulim të gjerë edhe në shtypin e huaj, veçanërisht në Angli. E arsyeja është e qartë. Fabio Paratici, ish-drejtori sportiv i Juventus i dënuar nga Gjykata Federale për 30 muaj, është Managing Director of Football i Tottenham. E tani tabloidët britanikë po ngrenë pyetje për disa operacione të kryera që kur ai zbarkoi në Londër. Në shënjestër, veçanërisht, blerja e shtrenjtë e Cristian Romero.
Pasi përfundoi aventurën e tij te Juventus, Fabio Paratici kaloi te Tottenham që nga viti 2021. Ai mbulon rolin e drejtorit sportiv, por me shumë më tepër kompetenca në duart e tij se te Juve. Skualifikimi i vendosur ndaj drejtuesit nga Gjykata e FIGC, mbi çështjen e fitimeve kapitale, po shkakton padyshim zhurmë edhe në Angli. Megjithëse, për momentin, nuk është e qartë nëse sanksioni është i zbatueshëm edhe jashtë Italisë (siç kërkohet nga Federata e Futbollit). Kjo pak rëndësi ka, sa kohë kanë filluar dyshimet se blerja e argjentinasit Romero nga Atalanta u zyrtarizua nga Paratici për të ndihmuar ish-klubin e tij.
DYSHIMI PËR BLERJEN E ROMERO
Dyshimi i tabloideve britanike dhe në veçanti i Daily Mail lind pikërisht nga blerja e mbrojtësit argjentinas. Romero është ndër 42 operacionet e vënë nën lupë nga Prokuroria. Paratici në fakt është akuzuar se e ka paguar më shumë se duhet lojtarin. Mbrojtësi erdhi te Spurs për një shumë totale, mes huazimit dhe riblerjes, prej 50 milionë eurosh. Një çmim i konsideruar i ekzagjeruar nga shumëkush. Megjithëse do të dukej i drejtë duke marrë parasysh shifrat që qarkullojnë në Angli. Ajo që po diskutohet megjithatë është një marrëveshje private mes presidentit të Dea Percassi dhe Juves. Në mesazhet private Percassi u premtoi bardhezinjve blerjen e një prej lojtarëve të tyre.
Në këmbim, numri një i Atalantës do të kishte marrë garanci në rast të mosblerjes së Romero nga ana e Tottenham. Kështu, operacioni është përfunduar për të ndihmuar bardhezinjtë. Kur ndodhi blerja e argjentinasit, Atalanta bleu Demiral nga Juventus…
