Kryeministri Edi Rama ka premtuar qeveria e tij do të heqë të gjitha tarifat doganore për mallrat që do të importohen nga Kosova. Njoftimi vjen një ditë para mbledhjes së dy qeverive që pritet të mbahet të hënën në Prishtinë.
Pasi vizitoi një fabrikë mielli Rama tha se Shqipëria do t’i heq të gjitha tarifat doganore duke nisur nga produktet bujqësore. Përjashtim bën vetëm taksa e skanimit që është vendosur me anë të një koncesioni në parlament.
“Bashkë me ministren Frida Krifca flisnim për rritjen e bashkëpunimit dhe për shkrirjen komplet të të gjithë pengesave të kufirit me Kosovën, edhe kur vjen puna tek produktet bujqësore, kjo është A-ja. Ne kemi bërë një plan që do t’i heqim krejt tarifat doganore me Kosovën, do t’i heqim plotësisht.
Dëshirën e kemi që të bëhet bilaterale me Qeverinë e Kosovës, por ne do ta bëjmë, ata kanë kërkuar më shumë kohë për ta analizuar.
Kështu ne do t’i heqim tarifat për gjithçka që vjen nga Kosova, përjashto atë të skanimit se ajo është e trashëguar dhe s’lëviz por në gjithë pjesën tjetër më nuk do të ketë më tarifa për të gjithë ata që do eksportojnë nga Kosova në Shqipëri” – tha Rama që më pas u duk se ia la “topin” në dorë Albin Kurtit duke i përmendur edhe “Ballkanin e Hapur”.
“Anasjelltas duhet ta bëjë qeveria e Kosovës por qeveria e Kosovës do më shumë kohë për ta studiuar, ne do ta bëjmë gjithsesi. Sepse ne nuk duam që ta kemi pa tarifa për Ballkanin e Hapur e mos ta kemi me Kosovën, është e pakuptimtë,” - tha Rama.
Albin Kurti e ka kundërshtuar fuqishëm nismën Ballkani i hapur e cila ka shkaktuar jo pak herë përplasje mes tyre. ©LAPSI.al
