Drejtoria e Përgjithshme e Agjencisë së Mbikëqyrjes Policore bën me dije se ka nisur hetimet lidhur vrasjen e policit mbrëmjen e djeshme nga kolegu i tij. Ndërkohë është bërë edhe arrestimi i shtetasit Ludjan Zaimi, me detyrë oficer i patrullës së përgjithshme në komisariatin e policisë nr. 3 Tiranë. Zaimi qëlloi disa herë me armën e shërbimit pas një konflikti për motive të dobëta Çaush Saliasin, i cili vdiq në spital.
Gjithashtu njoftohet edhe arrestimi në flagrancë i punonjësit të policisë Lutfi Gjyla, 48 vjeç, efektiv i FNSH-së. Arrestimi i tij u krye pasi plagosi me armë zjarri një qytetar tjetër në ambientet e një bar kafeje në rrugën “Llazi Miho”. Gjyla, ka qenë duke konsumuar pije alkoolike dhe ishte në gjendje të dehur dhe ka përdorur armën e tij të shërbimit duke qëlluar në drejtim të shtetasit Myrteza Lika. Si pasojë, shtetasi M. L. ka marrë dëmtim në këmbën e majtë dhe është dërguar menjëherë në spitalin ushtarak, ku ka marrë ndihmën mjekësore dhe aktualisht është jashtë rrezikut për jetën.
