Beogradi u vu në shënjestër të një sërë kërcënimesh me bomba të hënën, duke përfshirë kërcënime ndaj shkollave, urave, restoranteve dhe një ndeshje futbolli, duke e bllokuar trafikun në orët e pikut në kryeqytetin serb.
Policia tha në një deklaratë se nuk u gjet asnjë mjet shpërthyes pas kontrolleve të ndryshme. Nuk ishte e qartë se kush qëndron pas kërcënimeve të supozuara me email.
Gati 100 shkolla fillore u evakuuan pas kërcënimeve, si dhe disa restorante, duke përfshirë McDonald’s dhe qendrat tregtare, urat, një kopsht zoologjik, aeroportin, një stacion hekurudhor dhe kompaninë e furnizimit me ujë.
Një ndeshje futbolli u shty pasi policia kontrolloi stadiumin.
Policia ka bllokuar trafikun mbi ura gjatë orëve të pikut, duke krijuar një bllokim të madh.
“Edhe pse kërcënimet duken të rreme, ne nuk duhet t’i marrim lehtë,” tha Branko Ruzic, një ministër i qeverisë serbe.
Autoritetet nuk kanë përcaktuar se kush qëndron pas kërcënimeve që janë shënuar gjatë ditëve të fundit me intensitet të shtuar gradualisht.
Tabloidët serbë thanë se të gjitha kërcënimet “erdhën nga jashtë si shenjë presioni” për refuzimin e Serbisë për të vendosur sanksione kundër Rusisë për pushtimin e saj në Ukrainë. Raportet nuk mund të verifikoheshin në mënyrë të pavarur.
Linja ajrore kombëtare Air Serbia është përballur me disa kërcënime me bombë në muajt e fundit pasi ishte kompania e vetme evropiane, përveç transportuesve turq, që mbante fluturime të rregullta drejt Rusisë, pavarësisht një embargoje të fluturimeve perëndimore.
Ministri i Brendshëm pro-rus i Serbisë, Aleksandar Vulin tha se “Serbia është objektivi i një lufte speciale që vjen nga adresa të ndryshme evropiane”.
