Që prej orës 20:00, në komisariatet e vendit dhe para kryeministrisë ka nisur protesta e heshtur për vdekjen e të riut Ilvi Meta në ambjentet e paraburgimit të komisariatit të Kavajës. Protesta e heshtur e thirrur nga Partia Demokratike ka nisur në Tiranë Fier, Lezhë, Vlorë, Gjirokastër, Shkodër, Durrës.
Protestës në Tiranë i është bashkuar edhe ish-Kryeministri Berisha.
Nën moton "Stop vrasjes në komisariate", protestuesit ndezën qirinj për të riun.
Ilvi Meta nuk e kishte për herë të parë arrestimin nga policia. Por të mërkurën vendosi t’i japë fund jetës duke u vetëvarur, siç thuhet zyrtarisht, me lidhëset e kapuçit të bluzës, brenda dhomës së ndalimit në Komisariatin e Kavajës, duke lënë mister shkakun e këtij gjesti ekstrem. Prindërit e mësuan lajmin e trishtë përmes televizorit. Babai ka akuzuar policët se e kanë rrahur djalin për vdekje, duke refuzuar që të pranojë mundësinë që ai mund të jetë vetëvrarë.
