Nga Shkodra, në një bashkëbisedim me gazetarë, Berisha hodhi poshtë pretendimet e krerëve të qeverisë se përgjegjësitë në aferën korruptive të inceneratorëve janë individuale.
“Sot jemi në kushte shumë të vështira por të kapërcyeshme, - theksoi ish-Kryeministri, - sepse sot kemi një organizatë kriminale. Le të thotë ç’të dojë, se e kam dëgjuar se i djeg shumë kjo fjalë, por nuk ka më kriminale... Kanë arrestuar Alqi Bllakon, në një kohë kur firmën e ka vendosur Edi Rama, e ka vendosur Ëngjëll Agaçi, e ka vendosur Arben Ahmetaj, e ka vendosur Erion Veliaj, e kanë vendosur ministrat.
E tani duan të thonë se është individuale. Jo! Kanë dalë në dritën e diellit siç janë organizatë kriminale, plotësojnë të gjitha kriteret ligjore për të qenë të tillë. Ne nuk kemi pasur dyshim fare, por kjo aferë i nxori siç janë dhe ju siguroj se kjo është vetëm njëra nga aferat e tyre.
Ajo që po bëjnë me energjinë atë, është jashtë çdo imagjinate, jashtë çdo imagjinate! Janë lëshuar mbi pasuritë publike sikur të ishte pronë e tyre. Bëjnë marrëveshje mafioze me njeri-tjetrin.
Është një revolucion që duhet t’i japë përgjigje kësaj klike!”
