Pas mbledhje së një dite më parë të Grupit Parlamentar ku për 6 orë me radhë kryetarit të Partisë Demokratike iu kërkua që të largohet nga drejtimi, Lulzim Basha ka thirrur edhe një herë në ndihmë krerët e degëve në rrethe. Pjesa më e madhe e tyre janë të emëruar ose komanduar nga vetë Basha ndaj ata kanë mbajtur në mbledhje sërish një qëndrim kundër deputetëve.
“Deputetët duhet të jenë të kujdesshëm. Nëse kërkojnë dorëheqjen e Bashës të vënë edhe mandatin e tyre në tavolinë. Asnjë s’e ka fituar vetë mandatin, jemi edhe ne aksionarë të mandateve të tyre” – mësohet të ketë thënë kreu i degës nr 8 në Tiranë, Pëllumb Seferi.
Ndërsa kreu i degës së Mallaksatrës, Agron Kapllanaj është shprehur se vendimi i 9 shtatorit për përjashtimin e Sali Berishës nuk mund të ndryshojë.
“Rruga më e thjeshtë është të hapim garë në PD. Të lëmë datën e zgjedhjeve dhe të hyjmë në zgjedhje. A na bën mirë kjo? Mendoj se jo. A i bashkon demokratët? Jo. Ndoshta do i dëmtojë më shumë, do çahet më shumë” – ka thënë Kapllanaj.
Kujtojmë se ky i fundit kishte vënë bast karrierën politike se Berisha nuk do merrte Shkodrën, por pas daljes së rezultateve nuk e mbajti fjalën.
Ndërsa më i flakti në mbrojtje të Bashës në mbledhje ka qenë, Ilir Koçia, Kreu i Partisë Demokratike në Kuçovë që ka qenë kategorik se Basha nuk mund të largohet në këtë situatë.
“Si të ikë Lulzim Basha dhe ta lërë PD-në në ciklonin e përplasjeve me Sali Berishën? Nuk jam dakord. Ne na duhet zgjidhja. Kryetari e ka bere te qarte se është i gatshëm për çfarëdo lloj zgjidhjeje” – ka thënë Koçia. ©LAPSI.al
