Drejtoria e Përgjithshme e Burgjeve me 8 grupe të forcave të saj operacionale ka kryer këtë të diel kontrolle të befasishme në burgjet e Rrogozhinës dhe Reçit në Shkodër gjatë fashës orare 17:00 – 20:55.
Në burgun e Rrogozhinës janë kontrolluar 8 dhoma ku janë konstatuar pajisje elektronike si televizorë dhe aparatura Digitalb, të cilat i kishin të cenuar elementët e sigurisë apo “vulat”. U gjet nga grupet e kontrollit edhe një orë dore e gjetur që dyshohet se përdorej si pajisje komunikimi.
Ndërsa në burgun e Reçit u gjet një pajisje komunikimi Android e modifikuar në një kuti kartoni, e cila e lidhur me televizorin mund të realizonte ndërveprim në rrjetet sociale.
Po ashtu gjatë kontrollit u gjet edhe një thikë e improvizuar, një radio dore e modifikuar me dalje USB dhe antenë etj. Në njoftim thuhet se materialet u janë kaluar ekspertëve të SHKB-së së burgjeve. ©LAPSI.al
