Kryetari i Partisë Demokratike, Lulzim Basha ka mbërritur në Prokurorinë e Posaçme Anti-Korrupsion (SPAK). Basha do të pyetet rreth çështjes “Toyota Yaris”, pasi prokurorët belgë kanë mbërritur në Tiranë. Prokurorët kanë kërkuar marrjen në pyetje të kreut të PD-së, i cili paralajmëroi kapjen e makinave me miliona euro në portin e Durrësit, që ishin nisur pikërisht nga shteti belg.
Kujtojmë që në qershor të 2018-ës, policia konstatoi një shumë prej 3.4 milion euro në një makinë tip “Toyota Yaris”. Shuma u fut ilegalisht në vendin tonë dhe SPAK dyshon se bëhet fjalë për para të ardhura nga një aktivitet i paligjshëm në Belgjikë. Në lidhje me këtë çështje gjykata e Tiranës dënoi Ervis Vladin, si personi i cili i futi këto shuma për akuzën e “Mosdeklarimit të të hollave në kufi”.
