Dega e PD-së në Durrës thotë se në primaret e zhvilluara në 30 janar në këtë qytet morën pjesë 1546 anëtarë të saj. Faqja e PD-së në Facebook shkruan se përgënjeshtron lajmet që thonë se pati më pak anëtarë.
“Koha kur Lulzim Basha vendoste me pazare okulte e kandidatë që i sillte surprizë në momentin e fundit në Durrës, ka marrë fund! Lulzim Basha dhe altoparlantët rreth tij nuk mund të fyejnë demokratët durrsakë që dolën e votuan në votimet primare me pretendime dhe montazhe filmimesh të pjesëshme se gjoja nuk kanë votuar 1546 anëtarë. Për një gënjeshtar kronik kjo gënjeshtër e paskrupull është normale” – thuhet ndër të tjera në reagim.
Ky qëndrim vjen pas publikimit të një videoje që pretendon se në qendrën e votimit kanë hyrë vetëm gjysma e personave që sipas Komisionit të Rithemelimit kanë marrë pjesë.
“Si në 30 qershor 2019 kur nuk guxoi të hynte në zgjedhje dhe arritja më e madhe ishte filmimi fshehurazi ndërkohë që demokratët kërkonin përballje në kutitë e votimit, Lulzim Vula sajon lajme me filmime të montuara” - thuhet në reagim. ©LAPSI.al
