Në prag të thirrjes së dy kuvendeve të jashtëzakonshme brenda PD-së, Radio Televizioni Ora dhe Antonio Noto publikuan sondazhin për atë që po ndodh brenda kësaj partie.
Ajo që bie në sy është se nëse demokratët do të votonin nesër për liderin e tyre të ri ai do të ishte Sali Berisha. Kampioni i sondazhit është 1 mijë. 40 % e të anketuarve janë deklaruar afër PD-së. Marzhi i gabimit është 3.5 - 4%.
Pyetje: Nëse nesër do mbaheshin zgjedhjet për liderin e ri të PD-së, ju cilin do votonit?
30.2% e të anketuarve kanë zgjedhur Berishën, ndërsa 14.3% e tyre kanë zgjedhur Bashën. 47.6% e të anketuarve janë përgjigjur "asnjëri prej tyre", ndërsa 7.9% e tyre, "nuk e di". Mes të anketuarve të PS-së, 17% kanë zgjedhur Berishën, ndërsa 21.5% Bashën.
Por çfarë mendojnë qytetarët dhe votuesit lidhur me Foltoren e Berishës, nëse ajo është për interesin e PD-së apo atë personale të Berishës. Sipas gjetjeve të sondazhit të Noto-s & RTV Ora, 41.7% e qytetarëve përgjigjen se Berisha është duke menduar për veten dhe jo për PD-në.
Pyetjes nëse është e vërtetë apo nuk është e vërtetë që Basha ka bërë një pakt me Ramën që të mund të eleminojë Berishën nga politika shqiptare, 33% e shqiptarëve nuk e besojnë kundrejt 31.9% që thonë "PO".
Të pyetur se cili ka më shumë aftësi për të fituar zgjedhjet e ardhshme, Basha apo Berisha, shqiptarët janë përgjigjur në favor të Berishës. Të anketuarit e sondazhit të sjellë nga RVT Ora & Noto janë përgjigjur 52.2% Berisha, 9.6% Basha, ndërsa 37.9% e tyre "asnjëri prej tyre".
Sipas gjetjeve të sondazhit të Noto-s & RTV Ora rezulton se 31.2% e shqiptarëve ndihen më afër Sali Berishës. Ndërsa 19.2% e këtyre personave të anketuar janë më pranë Bashës, shumica e tyre, 49.6% e tyre janë përgjigjur “nuk e di”. Ndërkohë, 66.5% e zgjedhësve demokratë janë përgjigjur se janë më afër Berishë, ndërsa 24.9% e tyre si më pranë Bashës. Sipas gjetjeve të sondazhit të Noto-s & RTV Ora, rezulton PD është një parti në krizë sipas 80.1% e socialistëve, 87.3% e demokratëve dhe 91.6% e LSI-tave. Mbi 14% e të anketuarve në sondazhin e RTV Ora e Noto janë përgjigjur se kanë shumë besim te zoti Berisha, ndërkohë 63% nuk kanë aspak besim. 8.3% e të anketuarve kanë pak besim, ndërsa 13.9% kanë mjaftueshëm besim.
Në bazë të gjetjeve të sondazhit, besim te Basha që mund të punojë në të mirë të Shqipërisë, e kanë vlerësuar me “shumë ose mjaftueshëm” 78.3% e qytetarëve. Ndërkohë, rezulton se 55.6% e demokratëve nuk e kanë këtë besim te kryedemokrati Basha dhe po ashtu, edhe 68% e socialistëve. Pyetja se sa besim keni tek Edi Rama si lider politik që mund të punojë në të mirë të Shqipërisë, mbi 52 % e të anketuarve në sondazhin e RTV Ora e Noto janë përgjigjur se nuk kanë aspak besim, ndërkohë 20.7% kanë shumë besim. Interesante janë zgjedhësit e LSI nga të cilët 41.5% kanë votuar se kanë aspak besim, ndërsa 58% kanë Pak. Vetëm 3.7% e votuesve socialistë nuk kanë fare besim. /RTV Ora
