Një nga lojërat sfiduese në rrjetin social “Tik-Tok” që quhet “Blackout” duket se është bërë shkak për vetëflijimin e fëmijës 13-vjeçar që u gjet pajetë në fshatin Golem të Lushnjës pak ditë më parë.
Në telefonin e viktimës, policia ka gjetur disa video dhe imazhe të errëta, ku persona të ndryshëm, përfshirë dhe fëmijë, aplikojnë sfidën e lojës “Blackout”. Ajo ka si qëllim arritjen e gjendjes së të fikëtit.
Kjo lojë ka shkaktuar dhjetëra viktima në moshë të re në disa vende të Europës, por rastet nuk kanë munguar edhe në Shqipëri.
Hetimet paraprake të policisë dhe prokurorisë së Lushnjës, tregojnë se 13-vjeçari ka dashur të bëhet pjesë e kësaj sfide. I mituri kishte në Tik Tok një profil me emrin “Bad Boy Team” ku postonte video me vrasje dhe dhune.
Pjesa më e madhe e të rinjve që e kanë provuar këtë sfidë, kanë përfunduar në tragjedi, duke humbur jetën. Nga ekspertiza mjeko-ligjore, e administruar tashmë në dosjen e prokurorisë, rezulton se i mituri ka ndërruar jetë për shkak të asfiksisë.
Në vendin ku u gjend i vetëvarur, familjarët gjetën dhe një thikë. I mituri dyshohet se ka tentuar të vetëvaret dhe më pas të presë litarin, por nuk ia ka dalë dot duke humbur jetën.
“…ky është një rast tragjik, që merr shtysë nga lojërat ekstreme që qarkullojnë në rrjetet sociale…” - thanë burimet pranë policisë së Lushnjës.
Hetimet tashmë nuk kanë një autor të dyshuar, pasi dhe personat që orientojnë të rinjtë për t’u bërë pjesë e këtyre sfidave në internet, janë virtualë.
Pasditen e 20 nëntorit 2021, Fëmija 13-vjeçar është gjetur nga familjarët i vetëvarur në dhomën e tij. Pasi e kanë kërkuar në lagje dhe e kanë thirrur disa herë ata kanë shpërthyer derën e mbyllur të dhomës.
Ky është rasti i dytë në pak kohë në Shqipëri. Në maj të këtij viti një 10-vjeçar nga Shkodra ndërroi jetë teksa xhironte një video në Tik Tok. ©LAPSI.al
