Kreu i Partisë Demokratike, Lulzim Basha u ka dërguar një mesazh video Partive Popullore Europiane, ku bën pjesë edhe PD, para samitit që kjo forcë politike europiane do të organizojë në lidhje me vendet e Ballkanit Perëndimor. Basha ka dhënë një mesazh para samitit duke thënë se Europa është ëndrra e çdo shqiptari. Kreu i PD-së shprehet se pret që të adresohen pengesat e Shqipërisë, por edhe rajonit, drejt BE-së.
“Qytetarët e Ballkanit Perëndimor janë të gjithë sy dhe veshë sa herë që ka një tubim të udhëheqësve të BE -së, plot shpresë për çdo derë që hapet dhe çdo dritë që shkëlqen përpara në lidhje me perspektivën e tyre evropiane. Evropa është ëndrra dhe destinacioni ynë. Isha 17 vjeç kur së bashku me të rinjtë dhe të rejat protestuam nën thirrjen “Ne duam Shqipërinë si gjithë Evropa”. Kjo thirrje e zemrave tona rrëzoi regjimin komunist”, thotë Basha.
