Pak minuta para se ish-kryeministri Sali Berisha të nisë takimin me simpatizantët e Partisë Demokratike në Durrës, Lulzim Basha preferoi të shmangë një përgjigje direkte për këtë çështje.
Pyetjes, nëse PD po përçahet nga nisma e Berishës, Basha iu përgjigj shkurt duke thënë se armiku i vetëm është Edi Rama.
“PD është e përkushtuar për të bërë gjithçka për Shqipërinë dhe shqiptarët, armiku i vetëm është regjimi i instaluar dhunshëm në 25 Prill” tha Basha pas takimit me ambasadoren Urzsula Gaçek dhe 2 përfaqësues të tjerë që kanë qenë drejtues të misionit të vëzhgimit të OSBE/ODIHR-it për zgjedhjet e 25 Prillit në Shqipëri.
Pas Tiranës, Fierit dhe Vlorës, Sali Berisha sonte në orën 18:00 do të takojë demokratët në Durrës. Ai është shprehur i vendosur për të vijuar takimet në bazë me qëllimin mbledhjen e firmave për të thirrur forumet e partisë për të rrëzuar vendimin e përjashtimit nga grupi, që sipas ish-kryeministrit është nul.
