Një vajzë rreth moshës 20-vjeçare është dërguar pa shenja jete në Urgjencën e spitalit të Ferizajt në Kosovë. Ajo është dërguar në spital nga disa persona të cilët pastaj janë larguar.
“Rreth orës 15:08 e kemi pranuar informatën se një vajzë rreth moshës 20 vjeçare është dërguar pa shenja jete në Qendrën Emergjente. Vdekjen e viktimës e kanë gjetur mjekët. Policia ka dalë në vendin e ngjarjes dhe po i zhvillon hetimet” - tha zëdhënësi i policisë për rajonin e Ferizajt, Kanun Veseli.
Ai shtoi se nuk dihet asgjë për personat që e kanë dërguar viktimën në spital.
“Viktimën e kanë sjellë disa persona. Nuk dihet numri i saktë. Policia po i zhvillon hetimet për të zbardhur rastin. Nuk dihet nëse viktima ka pasur shenja jete derisa ka arritur në spital, por vdekjen e kanë konstatuar mjekët në Qendrën Emergjente” – tha ai.
Veseli ka bërë të ditur se janë duke grumbulluar informacione shtesë dhe se rasti po vazhdon të hetohet.
