Kryetari i Lëvizjes Vetëvendosje, Albin Kurti ka folur pas takimit me Përfaqësuesin Special të BE-së, Miroslav Lajçak duke u shprehur se dialogu me Serbinë nuk mund të jetë prioriteti i parë apo i dytë i qeverisë së tij. Kurti tha se nuk e mohon rëndësinë e dialogut me Serbinë, por ai duhet të jetë i përgatitur mirë dhe i sinqertë. Lideri i LVV tha se Lajçak e ka informuar me procesin e dialogut në përgjithësi.
“Unë shpjegova edhe një herë që ne i kemi fituar këto zgjedhje me programin tonë që përqendrohet te drejtësia dhe punësimi, se jemi në kushtet e pandemisë COVID-19 dhe se nuk jemi kundër dialogut, por e duam parimor dhe të përgatitur mirë”, - ka thënë Kurti.
Kurti është pyetur nëse dialogu me Serbinë do të jetë prioritet i tij i parë, kur ai të jetë në krye të Qeverisë së Kosovës.
“Nuk mund të jetë prioriteti i parë ose i dytë, sepse janë drejtësia dhe punësimi. Nuk e mohoj rëndësinë e dialogut – edhe për BE-në, Kosovën dhe Serbinë dhe rajonin, por më e rëndësishmja është që ky dialog të jetë i përgatitur mirë. Të jetë dialog i sinqertë në të cilin nuk jemi në presionin e kohës, por jemi me përkushtimin për substancë”, - tha Kurti.
Ai ka mohuar të ketë diskutuar për çështjen e hartës së BE-së, e cila e shfaq Kosovën si pjesë të Serbisë Të martën në mëngjes Mirosllav Lajçak do të takohet edhe me ushtruesen e detyrës së presidentes, Vjosa Osmani. ©LAPSI.al
