Qytetarët e Kosovës me të drejtë vote po u drejtohen sot kutive të votimit të cilat do të jenë të hapura deri në 19:00 për të zgjedhur 120 deputetët e Kuvendit të Kosovës, për legjislaturën e 8-të. Këto janë zgjedhje të parakohshme parlamentare dhe në garë janë 21 parti politike, 2 koalicione dhe 5 iniciativa qytetare. Numri i përgjithshëm i kandidatëve të certifikuar është 1 mijë e 52 kandidatë.
Sipas Policisë së Kosovës procesi zgjedhor deri më tani e vlerëson si të qetë. Kështu ka thënë zëdhënësi i policisë, Baki Kelani. Ai ka theksuar se deri më tani janë iniciuar dy raste, njëri në Prishtinë e tjetri në Prizren.
Procesi i votimit në të gjithë vendin është duke vazhduar edhe në këtë orë të fundit që ka mbetur. I tërë ky proces është duke u vëzhguar nga Koalicioni i OJQ-ve “Demokracia në Veprim”. Sipas raportimeve të vëzhguesve të DnV-së që nga fillimi i procesit të votimit deri në orën 16:00, kanë votuar 37,3% e qytetarëve, krahasuar në të njëjtën periudhë kohore më vitin 2019 është më e lartë.
Prishtina dhe Ferizaj kanë daljen më të madhe të votueseve mbi 40%, ndërsa në komunat me shumicë serbe dalja vazhdon të mbetet më e lartë me mbi 50%. Rajoni i Prizrenit vazhdon të mbetet me daljen më të ulët në zgjedhje. ©LAPSI.al
