Viola von Cramon-Taubadel, kryesuesja e Misionit për Vëzhgimin e Zgjedhjeve nga Bashkimi Evropian, ka vizituar disa nga qendrat t votimit në Prishtinë, nga ku është shprehur se procedurat e hapjes së qendrave të votimeve, kanë shkuar pa probleme.
Disa incidente të vogla kanë ndodhur, por sipas saj, në përgjithësi procedurat në orët e para të votimit kanë vazhduar pa problem.
Nga Fakulteti Filologjik i Universitetit të Prishtinës, kryesuesja e misionit për vëzhgimin e zgjedhjeve nga BE, ka thënë se gjatë ditës do të ketë më shumë vëzhgim dhe se procesin e votimit do ta mbulojnë gjatë gjithë ditës së zgjedhjeve.
“I kemi disa incidente të vogla, por në përgjithësi të gjitha procedurat, prej asaj se çfarë kemi vëzhguar kanë shkuar mirë, nuk ka pasur ndonjë problem…. Unë mendoj se një ose dy votues nuk ishin në vendvotimet e duhura, ose ndonjë gjë e tillë, mirëpo nga ajo se çfarë kemi vëzhguar rreth 98 përqind është duke shkuar mirë dhe pa probleme . I kishim 30 ekipe për hapjen e vendvotimeve dhe do t’i kemi 58 ekipe në teren për tërë ditën”, ka thënë Cramon-Taubadel.
Ajo ka thënë se procesi duket i qetë, por që sipas saj është herët të flitet meqë kanë kaluar vetëm pak orë që kur janë hapur qendrat e votimit.
Megjithatë, vëzhguesja e Bashkimit Evropian theksoi se nuk ka ndonjë indikacion që mund t’i shqetësojë.
