Ministria e Jashtme greke dënon dëmtimin e memorialit të Thimio Lolit në fshatin Krania të Finiqit. Policia informoi se memoriali u hodh në erë në orët e para të mëngjesit të sotëm (23 korrik)
Në një reagim të publikuar në faqen zyrtare të kësaj ministrie shkruhet: " Ministria e Jashtme shpreh neveri dhe shqetësim lidhur me dëmtimin e memorialit të Thimio Lolit dhe e dënon fort atë. Një veprim i tillë që sfidon minoritetin grek dhe kundër marrëdhënieve Shqipëri-Greqi duhet të hetohen në mënyrë të menjëhershme dhe autorët të vihen para drejtësisë. Ne presim që Shqipëria të veprojë sa më shpejt të mundet për ti kthyer sigurinë minoritetit grek"
Deklarata mbyllet duke informuar se ministria e Jashtme, ambasada greke, por dhe autoritetet konsullore në Shqipëri po ndjekin nga afër ngjarjen.
Kjo është hera e dytë që memoriali i Thimio Lolit është sulmuar.
Ky memorial është sulmuar në dhjetor të vitit të kaluar nga persona të cilët grisën flamurin dhe i hoqën pllakën memorialit. Memorali u vendos aty rreth 7 vjet më parë dhe ka shkaktuar reagime të forta kundër, pasi Thimio Loli cilesohet si një ithtar i Vorio-Epirit, madje edhe një vrasës i dokumentuar i shqiptarëve.
