Pak ditë pasi në disa nga mediat u përhap fjala se në Kongresin e PS, Edi Rama është përplasur me deputeten Blerina Gjylameti, ajo sot është larguar edhe nga drejtimi i Komisionit të Posaçëm parlamentar për Reformën Zgjedhore. Në thelb të fjalës që u hap për sherrin e saj me Ramën, ishte fakti se Gjylameti ka protestuar se si kryetare e PS së Tiranës, ajo as nuk ishte pyetur për listën e këshilltarëve bashkiakë që do të kandidojnë përkrah Erion Veliajt.
Në një intervistë në News 24, vetë Blerina e mohoi si sherrin po ashtu dhe largimin e saj nga drejtimi i socialistëve të Tiranës. Po me sa duket zërat e përhapur nuk ishin pa gjë. Ajo sot humbi një shkallë në hierarkinë politike Në mbledhjen e grupit të PS, u vendos që në krye të Komisionit të Posaçëm parlamentar për Reformën Zgjedhore, në vend të saj të emërohet ish ministri Damian Gjiknuri. Nuk është çudi që pas lënies në harresë për listat dhe pas këtij degradimi, Gjylameti të humbasë edhe drejtimin e PS së Tiranës, ku Erion Veliaj po lobon fort për të pasur një idhtar të tij.
©Lapsi.al
