Një operacion i Antidrogës së Tiranës ka çuar në pranga një 48-vjeçare amerikane, e cila dyshohet se ka tentuar të trafikojë lëndë narkotike përmes shërbimit postar.
Sipas informacioneve, amerikanja me iniciale Sh.I., banuese në Shqipëri, kishte porositur një pako të ardhur nga SHBA. Gjatë kontrollit në doganë, brenda pakos u gjetën rreth 572 gramë karamele me lëndë të dyshuar narkotike të llojit cannabis sativa, në formë xhelatine.
Mësohet se, një agjent i infiltruar në rolin e postierit ka dërguar pakon në adresën e shtetases amerikane. Menjëherë pas marrjes në dorëzim të dërgesës, efektivët e Antidrogës kanë ndërhyrë duke e arrestuar 48-vjeçaren në flagrancë.
Gjatë pyetjeve në polici, shtetasja amerikane ka mohuar përfshirjen e saj, duke deklaruar se nuk kishte porositur asnjë lëndë të jashtëligjshme dhe se pakoja nuk i përkiste asaj. Ndërkohë, grupi hetimor po vijon punën për të verifikuar nëse e arrestuara është pjesë e ndonjë rrjeti kriminal të trafikut të lëndëve narkotike.
