Izraeli ka kryer valë të reja sulmesh në jug të Libanit, duke goditur sipas ushtrisë izraelite infrastrukturë të Hezbollahut. Bombardimet prekën qytetin e Tirit dhe zona në lindje të tij, ku pamjet në rrjetet sociale tregojnë ndërtesa të shembura, zjarre dhe banorë të mbuluar nga pluhuri pranë rrënojave.
Ushtria izraelite kishte urdhëruar më herët banorët të largoheshin në veri të lumit Zahrani, rreth 40 kilometra nga kufiri me Izraelin, duke paralajmëruar se do të vepronte “me forcë ekstreme”. Urdhri për evakuim është më i madhi që prej hyrjes në fuqi të armëpushimit më 17 prill dhe prek rreth 14% të territorit libanez.
Si Izraeli, ashtu edhe Hezbollahu akuzojnë njëri-tjetrin për shkelje të përsëritura të armëpushimit. Izraeli thotë se po godet objektiva të Hezbollahut pas sulmeve me dronë ndaj trupave të tij në jug të Libanit dhe ndaj civilëve në veri të Izraelit. Hezbollahu deklaron se është përleshur me forcat izraelite në disa zona, përfshirë edhe përtej “zonës tampon” të shpallur nga Izraeli.
Situata humanitare po përkeqësohet. Strehimoret në Sidon janë mbushur plotësisht, ndërsa autoritetet në Tir po u kërkojnë banorëve të lëvizin më në veri, drejt Bejrutit. Sipas mediave libaneze, një sulm izraelit me dron goditi një familje që po largohej nga fshatrat e kërcënuara, duke vrarë gjashtë persona, mes tyre edhe fëmijë.
Kryqi i Kuq Ndërkombëtar paralajmëroi se jugu i Libanit po i afrohet një pike shumë të rrezikshme, ndërsa armiqësitë e vazhdueshme po krijojnë kushte të papërballueshme për civilët.
Përshkallëzimi rrezikon të dëmtojë edhe bisedimet për t’i dhënë fund luftës mes SHBA-së dhe Izraelit nga njëra anë dhe Iranit nga ana tjetër. Teherani kërkon që çdo marrëveshje të përfshijë edhe Libanin, ndërsa Izraeli thotë se do të vazhdojë të godasë kërcënimin nga Hezbollahu.
Libani u përfshi në luftë më 2 mars, kur Hezbollahu lëshoi raketa ndaj Izraelit pas një sulmi izraelit që vrau udhëheqësin suprem të Iranit. Që atëherë, sipas Ministrisë së Shëndetësisë në Liban, të paktën 3,213 persona janë vrarë në vend, ndërsa Izraeli raporton 23 ushtarë dhe 4 civilë të vrarë në të dy anët e kufirit.
BBC, përgatiti në shqip /LAPSI.AL
