Brenda në kryeministri po punohet me arredimin e ambjenteve sipas shijeve të kryeministrit Edi Rama. Duket se 4 milion euro që u shpenzuar për kopshtin Eden nuk mjaftuan për t'i dhënë godinës formën përfundimtare alla-Rama, ndaj punimet e brendshme po vazhdojnë thotë Belind Këlliçi, që ka publikuar disa foto nga ambjentet e kryeministrisë. "Punimet në foto po bëhen në hollin e Kryeministrisë dhe vleresohet se janë tejet të shtrenjta. Kushtojnë qindra mijë euro. Ndërkohë që protestohet prej 36 ditësh para zyrës së tij, autokrati fokusin e ka tek luksi personal!" shkruan Këlliçi në një mesazh në rrjetet sociale.
Ditët e fundit, Rama ka tentuar të reflektojë ndaj protestës që vazhdon prej më shumë se një muaji në bulevard. Në përpjekje për t'u dukur më i dhimbsur për shtresat në nevojë, u ka hedhur një bonus prej 5 mijë lekësh pensionistëve, ka sjellë në parlament propozimin për të shtuar ndihmën për fëmijët invalidë dhe ka shtuar buxhetin në ndihmë të të rinjve që angazhohen në start-up-e. Por pavarësisht presionit të shtuar, shefi i qeverisë nuk i ka rezistuar dot ngjyrave që i ngacmojnë syrin dhe mendjen në ambjentet e punës, si për ta konfirmuar edhe një herë idenë se pavarësisht rrethanave, vesi del me shpirtin.
