Presidenti francez, Macron tha se marina franceze ka kapur një anije cisternë nën sanksione ndërkombëtare që po udhëtonte nga Rusia. Operacioni u krye dje, në oqeanin Atlantik, me mbështetjen e disa partnerëve, përfshirë Britaninë e Madhe dhe në përputhje të rreptë me ligjin detar, shkroi Macron në rrjetin X.
“Është e papranueshme që anijet të anashkalojnë sanksionet ndërkombëtare, të shkelin ligjin e detit dhe të financojnë luftën që Rusia ka zhvilluar kundër Ukrainës për më shumë se katër vjet”, theksoi Macron. Ai paralajmëroi më tej se anijet që operojnë jashtë rregullave të përcaktuara detare paraqesin rreziqe më të gjera.
“Këto anije, të cilat nuk respektojnë rregullat më themelore të lundrimit detar, përbëjnë gjithashtu një kërcënim për mjedisin dhe për sigurinë e të gjithëve”, tha Macron.
