Policia e Shtetit duket se ka gjetur armikun e ri të rendit publik, review-t e këqija në internet.
Drejtori i Përgjithshëm i Policisë, Skënder Hita, deklaroi se strukturat e policisë po hetojnë një "aktivitet të dyshuar të koordinuar" në hapësirën kibernetike, që sipas tij synon të dëmtojë reputacionin online të bizneseve turistike në Shqipëri.
Në qendër të hetimit janë komentet dhe vlerësimet negative të publikuara gjatë ditëve të fundit ndaj hoteleve, restoranteve dhe subjekteve të tjera turistike, përfshirë edhe biznese që protestuesit i kanë lidhur me mbështetës apo njerëz pranë Edi Ramës.
Sipas Hitës, nga verifikimet paraprake "janë evidentuar mbi 10 mijë llogari me aktivitet të dyshimtë", disa të krijuara rishtazi dhe disa të tjera reale, që dyshohet se kanë postuar komente negative në mënyrë të sinkronizuar.
Ai tha se janë konstatuar raste kur e njëjta llogari ka publikuar review negative për biznese në qytete të ndryshme brenda një kohe shumë të shkurtër.
“Këto elemente po analizohen për të përcaktuar nëse kemi të bëjmë me një veprimtari të organizuar që synon krijimin e një perceptimi të rremë dhe dëmtimin e reputacionit të bizneseve shqiptare,” deklaroi Hita.
Nëse dyshimet konfirmohen, Policia paralajmëroi se materialet do t’i kalojnë Prokurorisë për vepra penale që lidhen me krimet kompjuterike dhe dëmtimin e interesave ekonomike.
Hita u bëri thirrje administratorëve të hoteleve dhe restoranteve që kanë konstatuar raste të ngjashme të bëjnë kallëzim dhe të ruajnë provat elektronike.
Pra, pas protestave në shesh, policia ka kaluar te “protesta” në Google Reviews. ©Lapsi.al
