Gjykata e Posaçme e Shkallës së Parë dënoi tre persona për blerje votash në Qarkun e Lezhës gjatë zgjedhjeve parlamentare të 11 majit, në një vendim që duket më shumë simbolik sesa real përballë dimensionit të fenomenit.
Gersi Kaçorri, Besnik Uka dhe Artur Jahja u shpallën fajtorë për korrupsion aktiv dhe pasiv në zgjedhje, pasi sipas SPAK kishin shpërndarë para për votues në Bashkinë Kurbin në mbështetje të Partisë Socialiste. Ata u dënuan me nga një vit burg, dënim që u reduktua në 8 muaj dhe u pezullua, duke u vendosur në shërbim prove për një vit e gjysmë. Pra, as edhe një ditë burg.
Në një vend ku raportet ndërkombëtare flasin për përdorim masiv të shtetit në funksion të pushtetit, presion ndaj administratës, blerje votash dhe përfshirje të elementëve kriminalë, drejtësia duket se gjen forcë të godasë vetëm raste sporadike dhe individë periferikë.
Raporti i OSBE-ODIHR për zgjedhjet e 11 majit theksonte se Partia Socialiste përfitoi nga përdorimi i gjerë i burimeve administrative gjatë fushatës, duke krijuar një avantazh të padrejtë. Po ashtu, u raportuan raste presioni ndaj votuesve dhe përdorim i mekanizmave shtetërorë në funksion të garës elektorale.
Në këtë realitet, dënimi i tre personave për një episod lokal të blerjes së votës krijon përshtypjen e një drejtësie që ndëshkon hallkat më të dobëta të zinxhirit, ndërsa mekanizmi i madh i manipulimit elektoral mbetet i paprekur. ©Lapsi.al
